Rev 18 | GbrGAW | STEP | N deye avun vinya, ma gye malaika woi ɓe n She n begyi yakwoi, anyi ɓa bmiyana nwo mwamwayi.

Revelation of John 18

Ezhi Yakwo La Miya

1 N deye avun vinya, ma gye malaika woi ɓe n She n begyi yakwoi, anyi ɓa bmiyana nwo mwamwayi.

2 Wa sawyi n kalai, “Babila Dnagmayi nla miya, kwola miya, wola ze alijanu fiba, a guzhenyi a fazan zan ba, n zafun nukwoi dohodohoi. 3 Gama abye vinya n ku nuwan nukwoyi efinya owo aɓo nukwoi nya sin. Asu anyi nya n ku ɓahin dagma n woi, anyakunyi n ku ze anyanbwai ntu n wo nayida kala ɓo.”

4 Mawo begye kwoi gmi n eshe kwoi gna, “Fye la kun n wo aba emi aza, fyeto ye ɓedo n wo alaifiyin, kada a tafe ɓedo n woi. 5 Gama owo alaifi n la tugbaga n lawu n eshe, Shekwoyi nku shiri zhin wa tawo ntu wo aɓe nukwoyi ɓo. 6 Zhin wo shi wa zhin ho, nduɓo, gbawo aɓe zhin-zhin nukwoyi ta zun ɓa. Wa ga aza ebwe bugba wunya, gawo lonu zunɓa. 7 Wola sase dna n nanyi do n agmadai, mwi kwo do n kasu n ibugbawunyi n anyi. Nsayi woi gma nge, ‘Mi zhin Sarauniya nu tu n mi esu-shinkpegye, mito zhin anyigbai banzanya nun, mi ta kpe bugba wun yen.’ 8 Ntuce nu bugba wun efi nya n bwiciyi, n mikunyi ɓei ɓefye aba n nyipyeyi gmanyi nu, ena yi gyiwo n sagmanyi yi, gama Dagayi zhin iko da nu n wo dawo owa nyi.

9 “Anyi tukwoda nɓa dnabwa n wo aɓo nukwoyi a wyebwo nya zhinyi, ɓai dagma n wo alheri nyi, ɓa ɓei ciwo ebwi shi ɓa ɓei gye awu ɓai gmi n wo agusa. 10 Ɓa ɓei zhi n kpayi, ɓai vin n ednai, ɓai cibwi ge, ‘Owyi, Babila ezhi dnagmai n esa gmanyi nu n kwo kni zun aɓe.’

11 “Anya siyi anyi nya ɓei cibwi, ɓai wun bugba ntu nwo ɓo, gama zaho to cegni lo wa si oɓa akayan. 12 Owonu ɓei zhinɓa anya siyi dnagmayi n zinariya, azurfa, akuta manayi, luʼu-luʼu yi, linen manayi, siliki, n eje byei-byei yi, n na shinwan sundayi, n na akaya yi n na zhin n dagba nyi-kna yi, n na shinwan nakwoyi, akaya yi n sinkna byei-byei yi, n sunkna zhiyi-zhiyi, n kuta manayi yi. 13 N yaji yi, ntulare yi, n emi yi, n luban yi, n anab nuwan yi, zaitun emi yi, n wyiluku luku-luku yi, n alkama yi, anakwo, na adoko, karusai n na afyenuyi, har ɓedo n na a zanyikwoci wyewyeyi.

14 “Anya amanayi vinya n ɓa ɓo daho ɓa du, anyida n mwa-mwai n ɓa daho nyi ɓa ta jeho aba ɓen, ɓa du nyalo-nyalo.

15 “Ntucenu anyakunyi, nɓa ze a nyabwai ntu n na anya deye kun ɓo nyi, ɓa ɓei zhi n kpai, ɓai wo wahala dna n ɓahin tukwo, ɓai cibwi ɓai fi aku. 16 ‘Aiya, ezhi dnagmai, n bmiya ngye nyikwoza, n zhi-zhinyi n linen putu-putu yi, n eje bye-byei ciwu, n zhin-zhin yi n zinariya yi, n na a kuta manayi, n luʼu-lu-uyi. 17 N esa gmanyi yi ezhi yi nyabwa vinya n la wunya.’ Ayada vinya n aya tukwodai, n aya dnayi ɓa ɓei zhi n tagni. 18 Ɓai cibwi shi ɓa gye awu ɓai gmiya gun eshe, nge, ‘Nknibwayi nu n ezhi dnagmayi lo ngye deye pya?’ 19 Ɓa kpe abwitukun n ɓa tukwo, dna nɓa bugba wun, ɓai gna, ‘Ewyi, Ewyi, n ezhi dnagmayi aba, kwa zhinyi yi ze anyabwayi ntu n kwo nyabwa ɓo. Nʼsaiye n esa gmanyi yi ɓa ku bwi vinya.

20 “ ‘Amma oho, O eshe, dagma n owo bwi-bwi, efye Shekwoyi aɓi, n na anabiyi n na amanzaniyi, gama Shekwoyi ku owa dawo gafye n sayi.’ ”

21 Navun malaika yakwo, wala, kuta n wu n gye ata wyigwonya, wa shekwoya dna n nuwan yakwo, wa sawyi, “Babila ezhi dnagmai aɓa she kwoya, shi ma she kuta ye ya nyi. Kwa bwi n awyeba nyalo-nyalo. 22 Ata shan anyi begye wo n kwon, kwo amolo kwo amwayin, ata shan abwa ze doho-dohoi ze n ezhi yin, ata shan ewyi gwon. 23 Wyegma, wyegma okwo asukwo vinyal kwo fitila ato ɓei gye n kwo atagan n I jesun ato ɓei je amula a shan won, n na amula ɓa n na amula anyikwoyi begye dadayin. A kpe owo anyansiyi ye vinya n anyi, n wa dna anyi kwoce n wo aɓeyi-sunyi 24 Anabi n aza gyi-gyi-yi vinya n na aɓei wu ɓanyi, oɓa ami tulo n wo tukwo.”